Aktori dhe aktivisti Florian Binaj, ka qenë i ftuar në emisionin “Të Paekspozuarit” në MCN TV, ku shpjegoi përse ka dalë në protestat për rritjen e çmimeve.
Binaj tha se çmimi i naftës në Shqipëri është rritur në nivele të papërballueshme dhe se qeveria duhet të ulë taksat, sepse “karburanti nuk është luks, por mjet jetese”.
“Jo vetëm unë, por edhe ata që janë në protestë, ngrihemi sepse këtij populli ja kanë vrarë nervin poitila. Ngrihemi edhe për ata që nuk kanë mundësi të protestojnë. Jemi në këtë pikë sepse nuk kemi reaguar.
Kemi heshtur, kemi përtypur kemi bërë sikur s’kemi parë dhe dëgjuar.
Në këto kohë që po kalojmë, të gjithë qeveritë e Ballkanit, po marrin masa për ta lehtësuar. Jemi i vetmi vend që thotë shtrëngoni dhëmbët, na ruajt Zoti! Kjo është arsyeja pse unë dalë.
Njerëzit me 100 lek të vjetra levizin gjithë ditën, po flasim për njerëz që nuk u shkon as internet nëpër fshatra. 7 taksa kemi patur edhe në kohë paqe, kaq kemi edhe tani.
Ule pra taksën. Këtu ka shumë taksa në karburant. Karburanti nuk është luks, është mjet jetese”, tha Binaj.
