Gazmend Bardhi deklaroi këtë të Enjte se Partia Demokratike, momentalisht, ka nevojë për një proces të thellë reflektimi dhe analize. Sipas tij, pa kryer këto procese, s’mund të ketë dorëheqje.
Deklaratat i bëri në një prononcim për gazetarët.
“Së pari e kam thënë që ditën e parë pas daljes së rezultatit (të zgjedhjeve të 6 Marsit) s’mund të dalësh në konkluzion për përgjegjësi pa një proces reflektimi dhe analize. Cilido që e bën nënkupton që s’vendos të parin interesin e PD, interesin e demokratëve. Unë, si Sekretar i Përgjithshëm i PD-së kam zgjedhur të shprehem në institucione, do shprehem kur të mblidhet kryesia që është institucioni më i lartë qeverisës e vendimmarrës i partisë. Këto ditë i kam shfrytëzuar për analizë, reflektim, që qëndrimi që duhet të mbajë kryesesia të jetë në shërbim të PD-së. Besoj demokratët bien dakord që PD është në gjendje që e ka dëmtuar dhe po e dëmton PD-në. Për këtë arsye procesi i reflektimit e analizës duhet të jetë serioz. S’është çështje karrige, është çështje serioze në raport me demokratët dhe PD-në. Cilido që del në konkluzione pa një analizë, nënkupton se s’ka interes të parë interesin e demokratëve. Kam pasur dy qëndrime, koherencën dhe vendosjen të anën interesit të demokrateve dhe do vijojë ti ndjek”, tha Bradhi.
“S’mendoj dhe s’besoj se secili prej nesh s’ka përgjegjësi në situatën ku ndodhet PD, por askush s’duhet të mendoj se duke ikur, ikën përgjegjësia, ndaj dhe procesi i analizës duhet të jetë i plotë brenda PD-së. Është gjëja më e thjeshtë ti ikësh përgjegjësisë duke thënë ‘unë po jap dorëheqjen’. S’mund ta trajtosh PD si institucion kur në ditë të vështira ti ikën dhe në ditë të mira ti qëndron. S’ka njerëz të pazëvendësueshëm në institucione, por s’mund ta përgjithësosh situatën ku ndodhet PD në një emër apo dy emra, kjo është të mos mendosh për të ardhmen e PD”, shtoi ai.
