Pas ndërprerjes së mbledhjes së komisionit hetimor për CEZ, Shkëlzen Berisha ka folur jashtë Kryesisë së Kuvendit duke akuzuare Taulant Ballën se nuk pranoi që t’i lironte vendin e kryetarit një kolegu të tij deputet gjatë dëshmisë sepse nuk do që të dalë e vërteta.
Shkëlzen Berisha ripërsëriti gjithashtu se nuk mund të betohet përpara Taulant Ballës, pasi ky i fundit është i dënuar për shpifje ndaj fjalit të ish-Kryeministrit Sali Berisha.
“Ky njeri është dënuar dhe nuk respekton vendimet e gjykatës. Jo vetëm që është dënuar, por refuzon të zbatojë edhe vendimin e gjykatës. Ai refuzoi të çohej dhe t’i lironte vendin një kolegu të tij. Nuk deshi që ta zëvendësonte ndonjë koleg sepse nuk do të dalë e vërteta”, u shpreh Shkëlzen Berisha.
Djali i ish-Kryeministrit theksoi gjithashtu se nuk ka lidhje me asnjë nga dëshmitarët që janë thirrur nga komisioni dhe nuk ka dijeni se çfarë provash ka administruar komisioni.
“Nuk kam asnjë lidhje me zotin Ismailaj dhe as me zotin Kalaj. Mirë zoti Kalaj që nuk gjendet por Ismailaj? Unë nuk di çfarë prova ka administruar ky komision. Unë kam bërë deklaratë publike, e kam deklaruar që nuk kam lidhje me njeri. Për këtë ka dëshmitar, mund të pyeten dhe të flasin”, deklaroi Shkëlzen Berisha.
