Ish-Kryeministri Sali Berisha deklaroi mbrëmjen e sotme në emisionin “Çim Peka Live” se Komisioni Hetimor parlamentar për Inceneratorët nuk nxori rolin që kishte Engjëll Agaçi në këtë aferë.
Berisha tha se Agaçi u mbrojt, pasi është ai që i ka mbyllur dosjet në Shqipëri Lulzim Bashës.
“E dini ju kush ua mbylli dosjet Lulzim Bashës? Engjëll Agaçi. Basha ka probleme ligjore, qoftë me dosjen Nick Muzin ashtu edhe me Toyota Auris. Këto në Shqipëri ia mbylli Agaçi, por i ka të hapura. Pse nuk shkoi Basha po u kthye nga rruga? Sepse ata s’të falin”, tha Berisha.
Në këtë kuadër, ish-Kryeministri deklaroi se është kjo arsyeja pse Lulzim Basha mbrojti Engjëll Agaçin në Komisionin Hetimor, duke mos nxjerrë në dritë rolin që kishte ai në aferën e inceneratorëve.
“Të jeni të bindur se do të dalin të tjera fakte dhe dokumente që implikojnë Agaçin”, tha Berisha.
