Nga Boldnews.al
Pikturat e tij surreale do të ktheheshin një ditë në tablo qeverisëse, duke lënë penelin dhe kapur mikrofonin me një “armë shfarosëse” që prek trurin-Propagandë quhet. Qëllimin ia arriti të merrte pushtetin dhe synimi për ta mbajtur me çdo kusht dhe mjet na ka lënë për më shumë se dy dekada në një regjim me tipare të theksuara të autoritarizmit.
Sor Rama festoi fitoren në pesë bashki të vendit, duke humbur vetëm Shkodrën që ende vijon rezistencën, ndonëse shumë e lodhur nga çdo sulm që vjen nga agallarët lokal dhe pashallarët “çorapekuq” të qendrës së pushtetit Rilindas.
Duhet të ishte një pikë kthese votimi në gjashtë njësitë vendore. Me çmimet e rritura të karburantit, bukës, mallrat e shportës dhe me skandalet që lulëzojnë çdo minutë pas asnjë pushim, minimalisht mund të kishte një rrudhje të votës së mazhorancës. Kjo nuk ndodhi. Në një vend me sadopak elemente të demokracisë këto votime do të ishin ndëshkim për pushtetin, për shumë arsye, qofshin edhe fare lokale.
Zgjedhjet në Vorë dhe Lushnje u zhvilluan pasi dy kryetarët e mëparshëm, përfunduan në qeli për korrupsion ose të proceduar për falsifikim të dokumentave. Por në të dyja bashkitë mazhoranca nxorri buldozierin e fushatës duke shënuar fitore të frikshme, që sot kënaq pushtetin, por nesër do jetë çizme më e rëndë në fytin qytetar. Në Durrës gjithashtu një batërdi kryetarësh që viheshin e hiqeshin sipas udhëzimeve të “akullores së Ramës”. Edhe aty në këtë qytet luguni votash rrodhën edhe nën erën e rëndë të inceneratorëve, që më shumë se djegin mbetjet, pjellin korrupsion.
Po si mundet kjo situatë? Fajet duhet ti ketë Putini, “armikun e jashtëm” e kemi gjetur, por pa e kuptuar se miku në votrën tonë është me mentalitet Putinizmi. Oligarki të madhe ka nga pas Putini. Protestuesit i shemb në dru, u hedh edhe gaz lostsjellës, i bombardon çdo ditë me propagandë njerëzit e tij. Sërish Putin qëndron…, madje rrit e rrit mbështetjen pas çdo skandali dhe dhune që ushtron mbi popullin e tij.
Edhe këtu tek ne nuk ka ndryshim. Çdo protestë qytetare ka përfunduar nën terrorin policor që shemb në dru, të mbyt në gaz dhe të përplas në qeli. Vërtetë këtu liderët e opozitës nuk janë të burgosur ashtu si në Rusi, por nuk ka qenë nevoja. Nëpërmjet parasë së pisët, krimit të organizuar dhe personazheve të trafikut të drogës dhe prostitucionit që gjetën oqzin deri në Parlamentin e Shqipërisë u duhet “opozitarizmi” vetëm si koperturë.
Oligarkët miliarderë i rrinë nga pas. Ngjashmëria është po kaq e frikshme këtu kur oligarkët e ndërtimit, hidrokarbureve, zhfrytëzimit minerar dhe shërbimeve janë gjithnjë në listën e preferuar që rrëmbejnë tendera, fitojnë PPP dhe luten e investojnë për jetëgjatësinë e një pushteti që i pasuron çdo sekondë që marrin frymë.
Lloj e sorollop nëpunësisht, drejtorësh, punëtorësh lokal, policësh e çdo rrogtar, në mos me bindje u detyrua të zgjasë duart në kutinë e votimit për ti dhënë edhe më shumë ushqim pushtetit. E kur bie fjala për ushqim e çmime si janë ato? Po makinën e more me vete, po bukë hëngre?
Nëse po sa e bleve litrin e naftës, duke e ditur fare mirë se qeveria ta ka bërë naftën dhe koka nuk të nxjerrë avull sikleti por tym karbonik që vjen nga oligarkia e pushtetit. Sërish voton e voton, rrit e rrit një përbindësh që nëpërmjet propagandës thotë se është engjëll.
