Deputeti demokrat, Tomorr Alizoti, e ka cilësuar dëshpërues rezultatin e arritur në PD në zgjedhjet e 6 marsit, ku në 5 Bashki u rëndit si forcë e tretë dhe vetëm në Rrogozhinë u rendit e dyta.
I ftuar në ‘Radarin Informativ’, Alizoti tha se ka ardhur momenti që Basha të tërhiqet.
“Unë isha i bindur për këtë rezultat. Meqë kjo ishte një betejë emocionale siç janë luftrat brenda llojit, kjo ishte një logjikë matematike. Kur dy grupime në një parti luftojnë, asgjësojnë njëra-tjetrën. Unë e kam thënë se Basha nuk ka asnjë mbështetje në atë parti. U shokova kur dëgjova që tha nuk ka humbur asnjë garë, kjo kalon në kufijtë e çmendurisë. Partia e tij ka dalë e treta. PD nga ana historike e rrezikonte mazhorancën. Unë mendoj se nuk duhet të kalojë asnjë minutë, Basha duhet të tërhiqet. Rama sot është komod, PD është tkurrur ky është një lajm i keq, Shqipëria sot nuk ka opozitë”, u shpreh Alizoti.
Më tej Alizoti bëri thirrje që PD të hapet dhe të hyjë në proces votimi pasi në këtë mënyrë rrezikohet pluralizmi.
Ai tha se edhe ish-kryeministri Sali Berisha pavarësisht se mbështet nga militantët nuk e rrezikon Ramën në pushtet..
“Unë nuk kuptoj më se përse Basha duhet të vazhdojë më të rrijë në ikë në këtë parti. Pse Zoti duhet t’ia kërkojë Bashës të ikë? Ai të lexojë rezultatin. Demokratët duhet të marrin fatet në dorë, pasi kjo është në kufijtë e çmendurisë. Të përfundosh në Vorë në gjashtëqind e ca vota, kjo nuk ka më sens logjike. Unë nuk po kuptoj më asgjë, Basha duhet të ikë sa më shpejt nga partia. Por edhe zoti Berisha e dominon me militantë atë parti, por se çon dot PD-në në fitore. Pra sot nuk kemi më opozitë, sot rrezikohet pluralizmi në Shqipëri’, tha Alizoti.
