Kandidati i PD-së së Lulzim Bashës për Dibrën në këto zgjedhje lokale, Luan Haka, akuzoi socialistët për blerje votash.
Pasi hodhi votën në kutinë e votimit këtë të Diel, në një prononcim për mediat, ai tha se është bërë dhe kallëzim në SPAK. Haka shtoi se ditët në vijim do të paraqiten fakte të tjera.
“Siç shikoni kjo borë e bardhë, për Dibrën, sjell shpresë për ndryshim për nesër. Sapo votova. Dhashë një votë për Dibrën dhe për dibranët. E nesërmja do të jetë më ndryshe. Mendoj se Dibrës i ka ardh koha që të ketë një kryetar bashkie dhe jo një kryetar bashkie që drejtohet nga Tirana, nga ministra dhe drejtorë në Tiranë. Në Lure sot nuk shkojnë dot për të votuar, sepse nuk ka as rrugë. Sikur ato lekë që kanë harxhuar në këto ditë nga ministra dhe drejtorë, sot Lura do të kishte një ditë ndryshe. Fitore për PD”, tha Haka.
Ai foli dhe për problematikat në zgjedhje.
“Sipas informacioneve që kemi, në disa zona nuk votohet dot se nuk ka drita. Lura ka vetëm një qendër votimi, 15 fshatra duhet të shkojnë në këtë qendër votimi”, tha Haka.
“Shkeljet janë konstatuar para zgjedhjeve. PS nuk i lë për momentin e fundit. PS dje ka shpërndarë ndihme ekonomike duke u dhënë militantëve leke për zgjedhjet. Të gjitha komunat nga Sllava, Arrazi, Luzni dhe Maqellarë. Faktet konkrete, kemi bërë denoncime në SPAK. Ditët në vijim do jetë çdo gjë transparente”, shtoi ai.
