Ali Zili, 36 vjeç, është arrestuar si autori i dyshuar i krimit të dyfishtë të ndodhur në fshatin Progër të Devollit.
Policia njoftoi se kishte arritur të identifikonte dhe arrestonte autorin, i cili gjithashtu është banues i këtij fshati.
Nga dinamika e ngjarjes mësohet se i arrestuari ka hyrë në banesën e familjes Bami, ku ndodheshin Fatmira dhe Bukurie Bami, nuse dhe vjehrrë, përkatësisht 60 dhe 80 vjeç.
Nga raportimet mësohet se Zili ka shkuar në banesë për të grabitur, por ka hasur në rezistecën e dy grave, të cilati ka qëlluar me mjete të forta, duke i shkaktuar hemoragji dhe më pas vdekjen.
Gjithsesi pritet të jetë ekspertiza mjeko-ligjore që do të përcaktojë shkakun e vdekjes, edhe pse nga të dhënat paraprake në trupat e dy viktimave janë konstatuar shenja dhune dhe hematoma.
36-vjeçari Ali Zili mësohet se është me precedent të mëparshëm penal.
Njoftimi zyrtar i policisë
Shërbimet e Komisariatit të Policisë Devoll, në bashkëpunim me strukturat për Hetimin e Krimit në Drejtorinë Vendore të Policisë Korçë dhe Forcat e Posaçme “Shqiponjat”, pas njoftimit të marrë se në fshatin Progër, Devoll, ishin gjetur të pajeta dhe me shenja dhune në banesën e tyre shtetaset F. B., dhe B. B., menjëherë kanë shkuar në vendin e ngjarjes.
Falë reagimit të menjëhershëm, veprimeve të shpejta profesionale dhe hetimore, krehjes së zonës dhe informacioneve të siguruara në rrugë operative, shërbimet e Policisë bënë të mundur kapjen dhe arrestimin në flagrancë të autorit të dyshuar të ngjarjes, shtetasin A. Z., 36 vjeç, banues në fshatin Progër.
Ky shtetas dyshohet se ka hyrë për të vjedhur në banesën e viktimave dhe kur ka hasur në rezistencën e tyre, i ka dhunuar ato me sende të forta duke ju shkaktuar vdekjen.
Grupi hetimor ndodhet në vendngjarje dhe nën drejtimin e Prokurorisë po vijon punën për sqarimin e plotë të rrethanave të ngjarjes.
