Deputeti i PD, Belind Këlliçi tha në Syri Tv se koalicioni opozitar ‘Shtëpia e Lirisë’ do të sjellë ndryshim në zgjedhjet e pjesshme të 6 marsit.
Këlliçi theksoi se kohët e fundit, në të gjitha takimet elektorale ka parë entuziazëm dhe pozitivitet nga demokratët për ndryshim. Sakaq, Këlliçi deklaroi se Sali Berisha bëri për tre muaj atë që Lulzim Basha s’e bëri dot për 8 vite.
“6 kandidatët e ‘Shtëpisë së Lirisë’ në pak javë kanë rikthyer shpresën. Ka shërbyer lëvizja ‘Foltore’ e Sali Berishës. Foltorja, Primaret, Kuvendi, Basha nuk e bëri dot realitet në 8 vite. Berisha ja doli për tre muaj.”-tha Këlliçi.
Deputeti i PD, theksoi se Bardh Spahia do të fitojë Bashkinë Shkodër, Ardian Muka do të fitojë Durrësin dhe Elton Bano do të marrë Bashkinë Lushnjë.
“Kjo periudhë 6-mujore ka shërbyer që PD të shkundej fort dhe të dilte nga hipokrizia e ndërtuar në themel, ku humbja të shitej për fitore. Jemi sot në një politikë reale. Jemi kthyer tek AND-ja e PD-së. Nga 2013 në 2021 me PD ndodhi një denatyralizim i saj. Humbnim gjithë kohës, flisnim për fitore imagjinare. Berisha dhe mbështetësit e tij flasin për zgjedhje të parakohshme dhe një pranverë ndryshimi.”-tha Këlliçi.
Deputeti tha në Syri Tv se Komisioni i Rithemelimit ka mbështetjen absolute të demokratëve ndërsa shtoi se pas 6 marsit do të nisin hapat e menjëhershëm për zgjedhjet e parakoshme. Sakaq, Këlliçi tha se kanë synim të rrëzojnë Edi Ramën nga qeveria.
“Opozitën reale e përfaqësojnë kandidatët e ‘Shtëpisë së Lirisë’. Hapat do të jenë të menjëhershëm për zgjedhje të parakohshme, synojmë të rrëzojmë Edi Ramën.”-u shpreh Këlliçi.
Deputeti i PD nuk la pa komentuar audiopërgjimin e publikuar të kandidatit të PS në Rrogozhinë, Edison Memolla i cili shfrytëzon varfërinë e qytetarëve në këmbim të votave për zgjedhjet e 6 marsit.
Këlliçi deklaroi se Edison Memolla, në audiopërgjim shprehej se pas zgjedhjeve qytetarët do t’i lënë në harresë dhe shtoi se fenomeni i shitblerjes së votave nuk është vetëm në Rrogozhinë ku u vërtetua me fakte, por edhe në Durrës e Dibër.
“Mishëron mentalitetin tipik të Partisë Socialiste në 9 vite dhe mentalitetin në bashkitë e tyre. Kam denoncuar shkëputjen e energjisë elektrike ndaj qytetarëve që nuk votojnë PS. Dy drejtorë të OSHEE në Sukth prisnin dritat e qytetarëve, dhe më pas çonin një punonjës që për t’i rilidhur dritat të jepnin votën për PS. S’është vetëm në Rrogozhinë, por edhe në Durrës, sinjale edhe në Dibër.”-tha Këlliçi.
