Lulzim Basha shprehu bindjen se me 6 mars qytetarët durrasakë me votën e tyre do të zgjedhin ndryshimin, do të votojnë kandidatin e PD, Luan Hoti.
Basha tha se me 6 mars do të rrëzojmë rrethimin dhe se këtë e ka kuptuar nga takimet që ka pasur me qindra e mijëra qytetarë anembanë vendit.
“Korrupsioni i betonit apo betoni i korrupsionit ka shkatërruar këtë qytet historik. Ky shesh dhe këto sheshe kanë buçitur nga armët dhe topat e okupatorëve, ndërsa Durrësi është parë si porta hyrëse për të pushtuar tokat tona. Ky Durrës ka bucitur edhe nga qëndresa e durrsakëve dhe shqiptarëve. Me historinë e tij Durrësi ka buçitur edhe me heshtjen e tij, me heshtjen e mosaprovimit. Ne e njohim zemërimin e heshtur të durrsakëve sa herë ne nuk kemi mbajtur fjalën tonë”, tha Basha.
Në vijim ai shtoi se me 6 mars Durrësi do të buçasë sërisht me votat e tij në mbështetje të kandidatit Luan Hoti.
“Heshtja juaj është zemërim, derdheni zemërimin tuaj në kutitë e votimit, kthejeni zemërimin tuaj në votë në mbështetje të Luan Hotit”, tha Basha.
Ai kërkoi nga qytetarët durrsakë që të dalin masivisht në votime dhe të shpërfillin me votën e tyre arrogancën e treguar deri më tani. “Derdhni zemërimin tuaj në kutitë e votimit, ashtu siç keni bërë sa herë ju kanë gënjyer e mashtruar”, tha Basha.
Kandidati Luan Hoti në fjalën e tij ka vlerësuar fushatën si pozitive, duke u shprehur se ka një plan të qartë për ti ndryshuar fytyrën qytetit.
“Gjatë kësaj kohe të shkurtër të fushatës na kanë akuzuar, na kanë baltosur, janë përpjekur të na përcajnë, por nuk ja kanë dalë. Ne kemi qëndruar si qytetarë, kemi qëndruar si demokrate, kemi përcjellë modelin më të mirë të të qenit durrsak.
Sot është dita ti tregojmë durrsakëve se koha e përdorimit të Bashkisë për interesa private, e keq qeverisjes, e keq administrimit, e mungesës së vëmendjes ndaj interesave dhe nevojave të qytetarëve, i ka ardhur fundi. Arrogancës i ka ardhur fundi!
Pas dy ditësh, me votën tuaj, me votën tonë, do të ngjallim shpresën, do të hedhim hapat e parë për një fillim të ri, për një Bashki dhe nje Durrës ne sherbim te qytetareve.
E Diela e 6 Marsit është dita në të cilën Bashkia do të bëhet e juaja! Është dita në të cilën me votën tuaj do të vendosni të jeni vendimmarrësit për të tashmen dhe të ardhmen e qytetit”, tha Hoti.
