Ish-Kryeministri Sali Berisha, nga Lushnja, ku mbylli fushatën e kandidatin të koalicionit “Shtëpia e Lirisë” për kryebashkiak, Elton Bano, ka bërë thirrje që në 6 mars qytetarët të votojnë ndryshimin.
Ndërsa e ka cilësuar Banon si përfaqësuesin e opozitës së vërtetë, Berisha u shpreh se 6 marsi ka një rëndësi kombëtare, pasi rikthejmë shpresën te qytetarët dhe hapim derën për zgjedhje të parakohshme parlamentare.
Ai tha se nuk mundet që Parlamenti i patronazhistëve, bandave dhe mandateve të vjedhura dhe blera të vazhdojë më tej.
“Kudo ka vetëm një thirrje: ndryshim, ndryshim dhe vetëm ndryshim. Kjo qeveri mendon më pak se çdo gjë tjetër për qytetarët, pasi kanë vetëm një qëllim si të grabisë pasuritë publike, të vjedhë sa më shumë”, tha ish-Kryeministri.
Berisha e konsideroi Banon si njeriun e përkushtuar, te i cili lushnjarët do të gjejnë një bashki me dyer të hapura për zgjidhjen e halleve dhe probleeve të tyre.
“Ju i keni dhënë Lushnjes me këtë manifestim shpresën për ndryshimin e shumëpritur që presin shqiptarët nga vota juaj me 6 mars”, tha Berisha, duke shprehur bindjen se në zgjedhjet e pjesshme kryebashkiaku i Lushnjes do të jetë Elton Bano.
Berisha tha se me votën tuaj nuk zgjidhni vetëm Kryebashkiakun tuaj të shkëlqyer Elton Bano, por i ktheni shpresën shqiptarëve kudo ato ndodhen për ndryshimin e madh që ata presin.
Ish-Kryeministri premtoi se me zgjedhjen e Elton Banos si Kryebashkiak, Bashkia e Lushnjes do të bëhet shtëpia e çdo lushnjari, do të bëhet shtëpia transparente, që taksat tuaja të kthehen në shërbime dhe investime.
“Me votën tuaj ju do e ktheni bashkinë në një institucion që ju zgjidh hallet dhe problemet, dhe jo sikundër ka ndodhur që qindra milionë lekë të naftës së fermerëve shpërdoroheshin dhe vidheshin”, tha Berisha.
Kandidati Elton Bano duke iu drejtuar të pranishmëve tha se me 6 mars nuk është thjesht një votë politike, por një votë për qytetin tonë. Bano ka se me 6 mars çdo qytetar me të drejtë vote do të vendosë për të ardhmen, për veten dhe familjen.
“Çdokush që ka të drejtën e votës duhet të vendosë për të ardhmen e qytetit. Me 6 mars ne duhet të nisim ndryshimin, ti themi ndal pushtetit që ka shtuar varfërinë, që ju ka mashtruar e gënjyer, që ju ka vjedhur dhe shpërdoruar fondet”, tha Bano.
Ai tha se nuk ka asnjë ambicie tjetër përveç se të shërbejë me ndershmëri dhe të ndryshojë qytetin ku është lindur dhe rritur. “Do të jemi krenarë me votën e 6 marsit, ti kthejmë Lushnjes vendin që i takon”, tha Bano.
