Ka kaluar një javë që kur Rusia nisi pushtimin e Ukrainës dhe sulmet raportohet se po intensifikohen në qytetet kryesore – megjithëse vetëm një qytet i madh ka rënë.
Forcat ruse kanë marrë nën kontroll qytetin port kyç të Khersonit, në jug të Ukrainës. Është qyteti i parë i madh që është pushtuar nga trupat ruse.
Më shumë se një milion njerëz janë larguar nga Ukraina që nga fillimi i pushtimit të enjten e kaluar, thotë OKB, me më shumë se 500,000 prej tyre që shkuan në Poloninë fqinje.
Një hetim mbi krimet e mundshme të luftës dhe krimet kundër njerëzimit të kryera në Ukrainë është nisur nga Gjykata Penale Ndërkombëtare në Hagë.
Disa qytete janë nën bombardime intensive, duke përfshirë Mariupolin – ku kryetari i bashkisë ka paralajmëruar se të plagosurit nuk mund të ndihmohen për shkak të bombardimeve të vazhdueshme.
Ministri i Jashtëm rus, Sergei Lavrov tha se një luftë e tretë botërore do të ishte bërthamore, por ai shtoi se kjo nuk është diçka që rusët po mendojnë.
Kryeqyteti, Kievi, mbetet nën kontrollin e qeverisë ukrainase, megjithëse ka pasur disa shpërthime të mëdha dhe një autokolonë e madhe e blinduar ruse ndodhet jo shumë larg – me SHBA-të që thonë se ka ngecur për shkak të mungesës së karburantit.
