Departamenti Amerikan i Mbrojtjes thotë se forcat ruse kanë bërë pak përparim në 24 orët e fundit.
“Kolona prej 60 km që po drejtohet drejt kryeqytetit, Kiev është ngadalësuar nga luftëtarët ukrainas dhe mbetet e bllokuar”, – tha zëdhënësi John Kirby.
“Ne besojmë se rusët po rigrupohen dhe po rivlerësojnë përparimin që nuk kanë bërë,” – u tha ai gazetarëve.
Kirby vuri në dukje se trupat pushtuese në përgjithësi po përballen me më pak rezistencë në jug ndryshe nga veriu i vendit.
Por ai tha se Pentagoni nuk mund të konfirmojë se qyteti jugor Kherson ka rënë, siç kanë pretenduar rusët.
Me gjithë vrullin e tyre të ngadalësuar, paralajmëroi ai, Rusia mban në dispozicion fuqi shtesë që ende nuk është përdorur.
