Trupat e pesë viktimave që humbën jetën ditën e djeshme pas sulmeve ruse mbi kullën televizive në Kiev, u zhvendosën ditën e sotme nga autoritetet.
Të mbështjellë me mbulesa dhe të grumbulluar në bagazhin e një fugoni, 5 viktimat u dërguan për në morgun e qytetit, teksa kryebashkiaku i kryeqytetit Vitali Klitschko paralajmëroi se forcat ruse “po afroheshin më shumë”.
Ndër të tjera, Klitschko u zotua për të luftuar në mbrojtje të qytetit, mes frikës se së shpejti mund të goditet nga sulmet të tjera, teksa një artileri ruse 40 km e gjatë qëndron pranë qytetit.
Sulmi goditi kullën pasditen e të martës, duke shkatërruar dhe një memorial të Holokaustit që ndodhej në zonën historike të Luftës së dytë Botërore.
Kulla ndodhej në një zonë ku, gjatë Luftës së Dytë Botërore, ushtria naziste vrau në dy ditë 33 mijë hebrenj.
Klitschko tha se luftimet janë ende në vazhdim në qytetet Bucha dhe Hostomel, në periferi të Kievit, ku një numër i madh i automjeteve ruse të shkatërruara u fotografuan të mërkurën. Ai u kërkoi njerëzve në qytet ‘të mos humbasin qëndrueshmërinë’, duke thënë se e gjithë infrastruktura kritike është ende në punë dhe furnizimet humanitare po shpërndahen.
“I kërkoj të gjithëve, për arsye sigurie, të mos dalin jashtë pa nevojë. Në alarm – shkoni në streha të sigurta, – tha ai.
“Armiku po mbledh forcat më pranë kryeqytetit… Ne po përgatitemi dhe do të mbrojmë Kievin!”– përfundoi kryebashkiaku.
Shumë civilë kanë humbur jetën në Ukrainë, teksa trupat ruse sulmojnë nga ajri duke mos kursyer asnjë.
