Gazment Bardhi akuzoi sot Kryeministrin Edi Rama se e ka shndërruar Bashkinë e Lushnjes në skenë krimi, ndërsa nuk u kërkoi falje lushnjarëve dhe as u distancua nga korrupsioni dhe vjedhja në këtë Bashki.
Reagimi i Bardhit erdhi pas takimit që Kryeministri zhvilloi në Lushnje, ku shprehu mbështetjen për kandidaten e PS për Kryebashkiake, Eriselda Sefa.
“Edi Rama ishte sot në Lushnje, por nuk kërkoi ndjese për shndërrimin e Bashkisë në skenë krimi. Ai nuk u distancua nga korrupsioni dhe vjedhja në Bashkinë Lushnjë dhe u paraqiti sot qytetarëve të Lushnjes të njëjtën alternativë, anëtaren e të njëjtit ekip, që prej 15 vitesh mban peng Bashkinë e Lushnjes.
Lushnja ka zgjedhje të parakohshme në 6 Mars për shkak se Edi Rama abuzoi me besimin e lushnjarëve dhe se i gjithë zinxhiri drejtues i Bashkisë dhe Partisë Socialiste Dega Lushnje është sot në burg. Eriselda Sefa, kandidatja e Edi Ramës në Lushnje, është vetë e kallëzuar në SPAK për abuzime me detyrën dhe besimin e qytetarëve”, tha Bardhi.
