Ambasadorja e SHBA në Tiranë, në një mbledhje me të trupën diplomatike në Shqipëri, ka thënë se vlerëson rolin e të gjithë shteteve anëtare të NATO-s dhe BE-së në luftën ndaj Ukrainës.
Ajo theksoi se është kërcënuar sistemi ndërkombëtar që paraardhësit tanë e kanë rindërtuar prej dekadash, pas rrënojave të shkaktuar në Luftërat e Parë dhe Dytë Botërore. Yuri Kim nënvizoi se të gjithë solidarizohen me Ukrainën në këtë moment historik.
“Teksa shikoj rreth tryezës, po përpiqem të dalloj se çfarë na bën të gjithëve së bashku. Shumë nga ne janë anëtarë të NATO-s. Shumë nga ne janë anëtare të BE-së. Disa nga ne aspirojnë të bëhen pjesë e BE-së. Por të gjithë ne sigurisht e pranojnë që jemi në një moment historik. Që kërcënimi, sulmi dhe pushtimi i Ukrainës nga Rusia po përbën një kërcënim për të gjithë dhe për sistemin ndërkombëtar që ne dhe paraardhësit tanë kemi punuar për dekada, për ta ndërtuar nga rrënojat e Luftës së Parë dhe Dytë Botërore.
Gjithashtu është shumë e qartë se në kryeqytetet tona ne po i përgjigjemi këtij momenti. Po ngrihemi në lartësinë e këtij momenti në mënyrë që nuk i kishim pritur. Jemi të gjithë të befasuar, për shpejtësinë, vendosmërinë, këmbënguljen, seriozitetin dhe sakrificën. Kjo nuk vjen pa sakrifica me mënyrën se si ne po i përgjigjemi, duke i dalë në mbrojtje Ukrainës, por edhe duke dalë në mbrojtje të mënyrës sonë të jetesës. Ju shpreh vlerësimin e SHBA-ve për rolin e Shqipërisë në Këshillin e Sigurimit. Shpreh vlerësimin për të gjithë ju dhe përsëri e kuptojmë angazhimin tuaj në ndihmën humanitare apo ndihmën në fushën e mbrojtjes. Në fund, sigurisht nënvizojmë solidaritetin e plotë me Ukrainën në këtë moment të kësaj sfide historike. Ne jemi me ju, dhe vazhdojmë të jemi me Ju”, tha Kim.
