Përfundon takimi mes delegacioneve të Ukrainës dhe Rusisë. Lajmi është raportuar nga mediat ukrainase, sipas të cilave përfundimi i takimit është konfirmuar edhe nga këshilltari i ministrit të Punëve të Brendshme të Ukrainës, Anton Gerashchenko.
Ende nuk ka detaje nëse mes palëve është arritur apo jo një marrëveshje.
Takimi u zhvillua në kufirin Ukrainë-Bjellorusi dhe siguria e delegacioneve u morr përsipër nga udhëheqësi i Bjellorusisë Lukashenko.
Përpara takimit, presidenti i Ukrainës tha se vendi i tij donte një armëpushim të menjëhershëm dhe tërheqjen e trupave ruse. Ndërkohë, nga apala ruse është thënë se dëshirohet të arrihet një marrëveshje nga e cila përfitojnë të dyja palët.
Delegacionet
Është ministri ukrainas i Mbrojtjes, Oleksi Reznikov, një besnik i presidentit Zelensky, personi që udhëheqi delegacionin ukrainas në negociatat me palën ruse në Bjellorusi.
Në krye të delegacionit rus ishte Vladimir Medinsky, këshilltari i Putinit, ish-ministër i Kulturës (2012-2020), i njohur për nacionalizmin e tij ekstrem.
Në anën ukrainase të tryezës ndodhej edhe David Arakhamia, kreu i partisë së Zelenskyt, zëvendësministri i Jashtëm Mykola Tochytskyi, ish-ambasadori i Ukrainës në BE dhe më pas në Britaninë e Madhe Mikhailo Podoliak, këshilltari i presidentit dhe në këto ditë zëdhënësi i tij i palodhur për median, Rustem Umerov si dhe Andryi Kostin, zëvendëskreu i grupit të kontaktit tripalësh (Rusi-Ukrainë-OSBE) për një armëpushim në Donbas.
Sa i përket delegacionit rus, përkrah Medinskit ndodhej Alexander Fomin, zëvendësministër i Mbrojtjes dhe Andrei Rudenko, zëvendësministër i Jashtëm që nga viti 2019.
Në fotot e takimit nuk shfaqet miliarderi Roman Abramovich, i cili sipas ”Jerusalem Post”, me kërkesë të Kievit do të ishte në Bjellorusi për të marrë pjesë në këto negociata.
