Policia e Shkodrës ka arrestuar një 44-vjeçar për veprën penale kalim i paligjshëm kufiri.
Uniformat blu kanë prangosur shtetasin me iniciale B.D, i cili me makinën e tij tip “Range Rover” kundrejt pagesës ka tentuar të kalojë kufirin së bashku me 4 emigrantë të paligjshëm. Gjithashtu sipas njoftimit të policisë në Velipojë u regjistrua një sherr i madh mes të rinjve ku 4 persona rrahin dhe kërcënojnë me armë 22-vjeçarin.
“Specialistët e Seksionit për Hetimin e Trafiqeve të Paligjshme bënë arrestimin në flagrancë të shtetasit B. D. 44 vjeç, banues në fshatin Vukël, Malësi e Madhe.
Në aksin rrugor Shkodër-Hani i Hotit, në vendin e quajtur Vukpalaj, Malësi e Madhe, shërbimet e Policisë Kufitare Shkodër, kanë konstatuar se në mjetin tip “Range Rover “, që drejtohej nga shtetasi B.D, ndodheshin katër shtetas nga vendet e treta, të cilëve ky shtetas u kishte marrë një sasi eurosh me qëllim për ti ndihmuar të kalonin në mënyrë të paligjshme kufirin për në Mal të Zi”, thuhet në njoftimin e Policisë.
