Komisioni i Pavarur i Kualifikimit ka shkarkuar nga detyra dy gjyqtarë këtë të Premte.
KPK shpalli vendimin për shkarkimin e gjyqtarit të Durrësit, Shpëtim Reka. Vendimi i shkarkimit të Rekës u mor nga trupa e KPK-së e kryesuar nga Lulzim Hamitaj, me relatore Genta Tafa (Bungo) dhe anëtare Alma Faskjan. Gjatë seancës dëgjimore të mërkurën më 23 shkurt, gjyqtari Reka u përball me barrën e provës në të tre kriteret e rivlerësimit, për të cilat dha shpjegime dhe i kundërshtoi. Nëpërmjet avokatit të tij, Genci Çifligu paraqiti një mbrojtje të gjatë duke kundërshtuar konstatimet për balancat negative; dyshimet për pasuri të fshehura; gjendjen në konfliktin e interesit me ndërtuesit e pallateve ku ka blerë një apartament dhe një tjetër që i është dhuruar të birit nga gjyshja; dyshime për veprime fiktive në blerjen e një automjeti; si dhe huapërdorja pa afat e një makine nga një person i dënuar për trafik ndërkombëtar të lëndëve narkotike. Shpëtim Reka e ka nisur karrierën në sistemin e drejtësisë në vitin 1994 dhe punon prej më shumë se dy dekadash si gjyqtar në Gjykatën e Durrësit.
Po ashtu, KPK shpalli vendimin për shkarkimin e gjyqtares së Gjykatës së Rrethit Gjyqësor Pukë, Flutura Hoxha. Gjatë seancës dëgjimore të martën më 22 shkurt KPK konstatoi mosdeklarim dhe mu gesë të burimeve për pasuritë e prindërve. Gjyqtarja Hoxha pranoi disa pasaktësi, ndërsa kundërshtoi analizën financiare të Komisionit. Procesi i rivlerësimit ndaj gjyqtares Hoxha u krye nga trupa e KPK-së e kryesuar nga Etleda Çiftja, me relator Roland Ilian dhe anëtare Pamela Qirkon. Flutura Hoxha ka një karrierë të gjatë në sistem gjyqësor shqiptar. Nga viti 1998 deri në vitin 2006 ajo ka shërbyer si kryetare në Gjykatën e Rrethit Gjyqësor Pukë. Gjatë periudhës 2007-2011 ka mbajtur funksionin si inspektore në ish-Këshillin e Lartë të Drejtësisë dhe në 2012-ën u rikthye sërish në Gjykatën e Pukës.
