Udhëheqësi i burgosur i opozitës ruse, Alexei Navalny, ndaj të cilit po zhvillohet proces gjyqësor, gjatë seancës ka akuzuar presidentin rus Vladimir Putin se po e përdor pushtimin e Ukrainës për të mbuluar korrupsionin.
Navalny citohet të ketë kundërshtuar pushtimin e vendit fqinjë.
“Kjo luftë në mes të Rusisë dhe Ukrainës u nis për të fshehur nga qytetarët rusë vjedhjet dhe për të larguar vëmendjen e tyre nga problemet që ekzistojnë brenda vendit”, tha Navalny i veshur me uniformë të burgosuri.
Navalny prej më shumë se një viti ndodhet në burg për shkak të akuzave për mashtrim. Më parë, ai i mbijetoi një helmimi, për të cilin ai dhe Perëndimi thonë se ishte kryer nga Kremlini.
Ai po gjykohet brenda burgut të sigurisë së lartë për mashtrim, akuza të cilat nëse vërtetohen do të zgjasin burgimin e tij me 10 vjet.
