Rusia nisi sulmin ushtarak në orët e para të mëngjesit të sotëm ndaj Ukrainës, ndërsa kjo ngjarje që po trondit Botën, nuk mund të mos komentohej edhe nga avokati Spartak Ngjela.
Shpeshherë Ngjela shfaqet si politikani apo avokati që bën paralajmërime të forta, edhe pse shumë herë nuk i dalin, veçanërisht kur flet për situatën politike në vend apo arrestimet e mëdha nga SPAK.
Këtë herë, Ngjela analizon konfliktin dhe shkruan se Amerika i ka ngritur kurth presidentit rus Vladimir Putin me një luftë që mund ta drejtojë ajo.
Në një postim në “Facebook”, Ngjela shkruan se politika amerikane kërkon shkatërrimin e Rusisë ose eliminimin e Putinit nga opozita ruse.
“Kam një pyetje për këta pafillot që i gëzohen Rusisë.
Cila është pyetja?
Po sikur Amerika të kishte dislokuar aeroplanmbajtësen e madhe Ajzenauher në portin e Odesës në Ukrainë; të kishte bërë një marrëveshje ushtarake me Ukrainën dhe të kishte bërë furnizime armësh dhe raketash të sofistikuara aty: do ta bënte Rusia sulmin kundër Ukrainës?
Përgjigjja është – jo; nuk do ta bënte
Atëherë, pse nuk e bëri Amerika këtë lloj ndërhyrjeje?
Mundësia më e madhe është me përgjigjen: ajo i ka ngritur kurth Vladimir Putinit me një luftë që mund ta drejtojë Amerika. Siç duket politika amerikane kërkon shkatërrimin e Rusisë ose eliminimin e Putinit nga opozita ruse.
Ja pra, kjo është çështja.
Atëhere: mos është ky vërtet një kurth për shkatërrimin e Rusisë dhe të Putinit?
Gjithçka mund të ndodhë…”, shkruan Ngjela.
