Jorida Tabaku, kryetare e Komisionit Hetimor për çështjen e Inceneratorëve, deklaroi se buxheti i shtetit po shterohet çdo ditë e më shumë me shkeljet e qeverisë në pushtet.
Tabaku theksoi se me përfundimin e hetimeve për pak ditë do të dalë raporti dhe do kenë në dorë të gjithë procesverbalet e mbledhjeve të organizuara nëpër bashki për dhënien e kontratave koncesionare.
“Nuk ka shqiptar që nuk e ka kuptuar që qeveria ka dhënë 430 milionë euro pa garë kompanive që janë nën hetim. Shqiptarët paguajnë cdo ditë e më shumë e buxheti shterohet.
I kërkoj Bashkisë Tiranë listën shkresore për procedurën që kemi nën hetim, duhen procesverbale të mbledhjeve për dhënien e kontratave koncesionare.
Nesër përfundon hetimi dhe kemi pak ditë për raportin.
Rama mbrojti politikisht këta persona që kanë kryer shkelje, kryetari i Bashkisë Fier ka kryer shkelje po ashtu dhe më e rëndësishmja 3 administratorët nuk dinin të shpjegonin ku kanë shkuar paratë. Janë 3 inceneratorë në letër që nuk funksionojnë”, tha Tabaku.
Ajo u shpreh se opozita ka inkurajuar SPAK lidhur me hetimin e çështjes së inceneratorëve, duke shtuar se raporti me të gjitha gjetjet do të depozitohet në organin e akuzës.
