Në përfundim të mbledhjes së komisionit hetimor të inceneratorëve, pas kryeministrit Edi Rama, një deklaratë për shtyp ka dhënë edhe Jorida Tabaku. Ajo tha se Rama gjatë dëshmisë së tij në komision zgjodhi të mos thoshte të vërtetën por të mbronte korrupsionin.
Tabaku nënvizoi se dosja me të gjitha faktet për aferën e inceneratorëve do t’i shkojë SPAK-ut me përgjegjësitë e gjithsecilit që është i përfshirë.
“Për 10 orë dëgjuam dëshmitarin që e mbronte korrupsionin hiqte përgjegjësitë e tij nga korrupsioni ua linte të tjerëve. Tre persona që janë në kërkim janë duke marrë edhe sot para nga buxheti i shtetit. Komisioni ka vendosur para qytetarëve më zë dhe figurë faktet. Sot, Rama dështoi të thoshte se ku kanë shkuar 100 milionë që janë paguar këto inceneratorë. Dështoi të thotë si ka mundësi që një kontratë lidhet me një kompani pa eksperiencë. Komisioni provat i ka i ka administruar i ka parë si janë përdorur paratë, e ka parë se inceneratorët nuk punojnë, por nuk kuptoj si ka mundësi që Rama të jetë krenarë kur ka dy ministra në burg. Mbrojtja që i ka bërë kësja afere ishte e paprecedentë.
Sot doli në pah se firma e Ramës është hedhur me vetëdije, mbrojtja që bëri sot nuk është e rastësishme. Ai e di se çfarë ka ndodhur e di se nuk incenerohet që nuk kryhet procesi e di që janë projekte në letër. Sot e gjithë propaganda e tij ishte pse i keni mbushur mendjen shqiptarëve që janë 430 milionë euro. As këtë nuk arriti ta zhbëjë pavarësisht se aktroi”, tha Tabaku.
E pyetur nëse beson te SPAK, Tabaku tha: “S’dua të paragjykoj punën e askujt ne do bëjmë sa të mundemi. Dosja që do çojmë do jetë me përgjegjësitë e secilit”.
