Kryeministri Edi Rama tha se Lefter Koka nuk është nën akuzë për ndonjë mbledhje Qeverie, por për korrupsion individual që ka kryer me palën tjetër.
“Dyshohet se Lefter Koka ka bërë korrupsion, por kjo s´do të thotë që revolucioni për ta shndërruar Shqipërinë nga një gropë plehrash në një vend normal, pa plehra që derdhen rrugëve.
Unë di që janë ndërtuar dy vepra, një në Elbasan dhe një në Fier dhe procesi ka ecur përpara”, tha Rama para Komisionit Hetimor parlamentar për inceneratorët.
I pyetur nëse është në dijeni që janë financuar 100 % nga buxheti i shtetit, Rama tha se në 2013 Shqipëria ishte një gropë plehrash dhe kam mbështetur plotësisht gjithë punën e bërë, madje jam krenar për atë që është bërë.
“Vetëm gjysma e popullsisë mbulohej me shërbimin e grumbullimit të plehrave, që do të thotë se fëmijët rriteshin bashkë me plehrat”, tha Rama.
Ai pohoi se buxheti i shtetit ka financuar inceneratorët në Fier dhe Elbasan, ndërsa në Tiranë jo.
