Në praninë e Sekretarit të Përgjithshëm të PS, Damian Gjiknuri, ministres Milva Ekonomi, dhe zyrtarëve të tjerë socialistë, u prezantua në Durrës, kandidatja e PS-së për kryebashkiake, Emiriana Sako.
Kjo e fundit zhvilloi një takim me forumin e grave socialiste, ndërsa iu kërkua vota durrsakëve për të mbështetur kandidaturën e saj.
Sako falenderoi Kryeministrin Edi Rama për besimin që i dha për të kandiduar, ndërsa tha se Edi Rama i ka dhënë më shumë hapësirë vajzave dhe grave si askush tjetër.
“Puna është i vetmi argument sepse unë duhet të votohem nga qytetarët e Durrësit. Gjatë këtyre dy viteve kam pasur mbështetjen maksimale të Edi Ramës. Rindërtimi nuk është propagandë, por punë”, tha Sako.
Ajo foli për projektet që do të ndërmerren dhe realizohen me mbështetjen e Edi Ramës. “Nuk jemi qyteti i nostalgjisë agresive, por i demokracisë”, tha Sako.
