Gjatë takimit me banorët e Manzës, ish-Kryeministri Sali Berisha, ndërsa kërkoi mbështetjen për kandidatin e “Shtëpia e Lirisë”, Ardian Muka, hodhi akuza të forta në drejtim të kandidates socialiste, Emirjana Sako.
Berisha akuzoi Sakon si të papërgjegjshme, ndërsa tha se ajo helmoi qytetarët me djegien e plehrave natën, por edhe për pasojat e tërmetit të 26 nëntorit 2019.
“Përfaqësuesja e Edi Ramës çfarë bëri ajo? Jo vetëm solli plehrat këtu e i digjte natën dhe mbulonte qytetin me helme toksike, nuk vjen rastësisht ajo kandidate. Ajo është kryeinspektorja e të gjitha ndërtimeve të dëmtuara nga tërmeti i shtatorit 2019. Ishin pikërisht ndërtesat e dëmtuara që morën shpirtrat e qytetarëve me tërmetin e nëntorit, sepse kjo u tregua e papërgjegjshme, sepse banorët u lanë aty, që një tërmet tjetër t’u merrte jetën”, u shpreh Berisha.
Berisha e quajti çnjerëzor vendimin e Ramës për të mos i lejuar banorët që t’i shesin shesin shtëpitë e rindërtuara, pas tërmetit të 2019-ës.
“Ju e keni parë vetë se si u trajtuan ndihmat për tërmetin. Ju e keni përjetuar në kurriz që nga Kepi i Rodonit e deri këtu. Dhe tani shtëpitë e rindërtuara duan t’ua japin sikur janë të shtetit. E keni dëgjuar që ato nuk mund t’i shisni, por ky është një akt antikushtetues, antiligjor, çnjerëzor, shtëpia o është o s’eshtë e jotja, por këtë mund ta bëjë vetëm Edi Rama që ka psikologjinë e etërve të tij. Kur rrënohet shtëpia çdo shtet ndihmon banorët, qoftë diktaturë, qoftë vend i lirë, ndërton shtëpitë e shkatërruara. As Enver Hoxha nuk e ka bërë një gjë të tillë.
Kur u rindërtuan shtëpitë e shembura në Peshkopi apo Bushat, nuk iu është thënë banorëve se i keni për banim dhe nuk mund t’i shisni. A ka mendje më të mbrapshtë se kjo? Ju bëj thirrje, me votën tuaj të bëni ndryshimin, të votoni për Ardi Mukën për kryetar bashkie të Durrësit, votoni për logon Shtëpia e Lirisë dhe mos ngatërroheni me logon që ka konfiskouar Edi Rama për të mashtruar demokratët për Lul Bravën”, tha Berisha.
Ndërkohë për kandidatin Luan Hoti, që garon në siglën e PD, Berisha tha se nëse ai do të dëshironte për të kandiduar mund të hynte në garën e primareve.
“Është kandidat që hyri në garë për të përçarë votat e demokratëve, ndaj asnjë votë për Luan monopolin, pasi i shërben Edi Ramës.
Mos u gënjeni nga sigla, atë sigël e mban peng Lulzim brava me ndihmën e Edi Ramës. Ju them unë, se Luan Hoti ka marrë monopolin e shërbimeve në portet e vendit pasi ka çuar valixhen me lekë te Edi Rama, i cili mban peng Lulzim bravën, duke i mbyllur dosjen e Toyta Yaris. Basha dekospiroi një operacion ndërkombëtar, ndaj po hetohet nga prokurorët belgë. Këtu ia mbylli Edi Rama, pasi në rrethana të tjera do ishte arrestuar”, tha Berisha.
