Ministrja e Shtetit, Elisa Spiropali, ka reaguar lidhur me akuzat e Lulzim Bashës, për aferën e inceneratorëve. Spiropali tha se Basha është i pabesueshëm dhe këtë e konfirmojnë edhe qëndrimet e tij.
“Deri dje Basha deklaronte se kjo drejtësia e sotme ishte e kapur nga kjo mazhorancë dhe nga kjo Qeveri, ndërsa sot flet për hetime dhe arrestime”, tha Spiropali.
Sipas saj, Basha ka shpëtuar nga drejtësia me procedurë, ndërsa sot merret në pyetje nga Prokurorët belgë, sepse nuk di çfarë flet dhe s´mban përgjegjësi për asgjë.
“Ne lejuam ngritjen e Komisionit hetimor për menaxhimin e mbetjeve, edhe pse ishte në hetim nga SPAK. E morëm këtë vendim, pasi nuk kemi gjë për të fshehur. Nëse ka pasur shpërdorime detyre apo shkelje, e cakton SPAK, as ju dhe as Jorida Tabaku, e cila sot luan rolin e Prokurores, sepse ka hallin se mos e sulmojnë të vetët brenda partisë”, tha Spiropali.
Në vijim ajo tha se ne bëmë këtë drejtësi që është sot, që çon para drejtësisë kryebashkiakë e ish-zyrtarë. “Ne jemi të lirë, sepse kemi marrë vendimin për të çliruar drejtësinë, e cila iu kthye qytetarëve shqiptarë”, tha Spiropali.
