Ish-Kryeministri Sali Berisha e ka cilësuar si një nga aferat më të mëdha të planetit, atë që e konsideroi si rrëmbimin e 800 mijë metra katror në portin e Durrësit, përmes një skeme mafioze.
Berisha tha se u përdor një skemë tipike për mafien, duke gjetur një kompani në Emiratet e Bashkuara, duke firmosur një marrëveshje me Qeverinë e Emirateve, për të bërë kornizën e maskës, me të cilën duan të rrëmbejnë tokën, dhe fill pas kësaj, siç thotë ministrja që njihet më shumë se çdo gjë tjetër për grykësinë e saj, me rregullat e saj, aksionet u shitën 100 %, në kundërshtim me rregullat tregtare, në kompanitë offshore të dyshes Rama-Basha.
Ish-Kryeministri u shpreh se ajo që po zhvillohet në Portin e Durrësit është disa herë më e madhe si mega-aferë se ajo e inceneratorëve.
Berisha tha se këtë aferë po e përdorin për të pastruar milionat e kamionëve të drogës. “Babëzia dhe lakmia e verbër e fitimit çon në vendime të pashembullta në 3 mijë vite”, tha Berisha.
“Ne mblidhemi sot këtu për njërën nga aferat korruptive ndoshta tani për tani më të madhe të planetit. Jo vetëm të Ballkanit e të Europës, por të planetit. Mblidhemi në një moment kur mega-grabitës, mega-plaçkitës kanë vendosur t’i rrëmbejnë qytetit në një skemë klasike mafioze, 800 mijë metra katrorë me një vlerë disa miliardë euro.
Kanë përdorur një skemë tipike për mafien, kanë gjetur një kompani në Emiratet e Bashkuara e njohur në shumë aspekte, kanë firmosur një marrëveshje me qeverinë e Emirateve për të bërë kornizën e maskës me të cilën duan të rrëmbejnë tokën dhe fill pas kësaj, Emari është zhdukur, siç thotë ministrja që meriton më shumë se çdo gjë tjetër apo që njihet më shumë se çdo gjë tjetër për grykësinë e saj, me rregullat e saj i shiti 100% kompanive offshore apo kompanisë offshore Rama-Basha, të gjithë aksionet e 800 mijë metrave katrorë, tokë në zemër të Durrësit.
Edhe inceneratorët që janë vjedhje flagrante, duken një nënfish i vogël i kësaj që po zhvillohet në Durrës. Durrësi, një qytet 3-mijë vjeçar, ekzistencën ia ka dedikuar portit. E thotë Milan Shuflaj, në kohëra të mira Durrësi zgjerohet, në kohëra të vështira rrudhet. Por asnjë pushtues nuk e la Durrësin pa port. Në këtë mënyrë, babëzia dhe lakmia e verbër e fitimit, çon në vendime të pashembullta në 3 mijë vite,” tha Berisha.
