Brazil-Argjentinë do të riluhet. Këtë e vendosi Komisioni Disiplinor i FIFA-s, pasi ka analizuar me kujdes atë që ndodhi në Sao Paulo më 5 shtator 2021, në ndeshjen e vlefshme për kualifikueset e Botërorit të Katarit.
Menjëherë pas fillimit të kësaj supersfide, autoritetet shëndetësore braziliane hynë në fushë dhe pezulluan ndeshjen, të shoqëruar nga policia, e cila donte të arrestonte disa futbollistë argjentinas për shkelje të rregullave ndërkombëtare të protokolleve anti-Covid.
Komisioni i FIFA-s jo vetëm vendosi që ndeshja duhet të riluhet në një datë dhe vend ende për t’u përcaktuar, por gjithashtu gjobiti dy federatat dhe pezulloi 4 lojtarë argjentinas për dy ndeshje (Emiliano Buendía, Emiliano Martínez, Giovani Lo Celso dhe Cristian Romero).
Në njoftimin për shtyp thuhet: “Komisioni Disiplinor arriti në përfundimin se braktisja e ndeshjes erdhi si rezultat i mangësive të ndryshme nga të dyja palët e përfshira dhe për këtë arsye vendosi të urdhërojë Federatën e Futbollit të Brazilit të paguajë një gjobë prej 550.000 frangash zvicerane (afërsisht 525 mijë euro) për shkelje në lidhje me rendin dhe sigurinë, si dhe braktisjen e lojës.
Edhe kombëtarja argjentinase gjobitet me 250 000 franga zvicerane (238 mijë euro) për mospërmbushje të detyrimeve në lidhje me rendin dhe sigurinë, përgatitjen dhe pjesëmarrjen në ndeshje, si dhe braktisjen e saj”.
