Vazhdon përplasja në distancë mes PS-së dhe LSI-së. Nënkryetari i Lëvizjes Socialiste për Integrim Petrit Vasili ka bërë një deklaratë që shigjeton aleatët socialistë.
Duke folur për zgjedhjet në njësinë administrative numër nëntë në Tiranë, Vasili theksoi se kjo njësi është shembull i organizimit dhe i rritjes së pandalshme të LSI-së duke vlerësuar rolin e të gjithë anëtarësisë.
“Një parti e cila nuk ka të shkuar nuk mund të ketë të ardhme. LSI-ja ka historinë e saj dhe historinë e bëjnë njerëzit. Dhe kur njerëzit janë aty, historia është e gjallë dhe është një histori që zhvillohet. Nuk është mosmbajtja e fjalës dimensioni ynë dhe kjo na dallon. Ua them këtë gjë sepse populli ka një shprehje të thjeshtë ‘i miri dallon’”, tha Petrit Vasili.
Kuptimin e këtij mesazhi e kupton vetëm Kryeministri Rama. Deklaratat e djeshme të ministrit Lefter Koka kanë nxjerrë në pah përçarjen mes dy forcave kryesore të koalicionit.
