Arben Imami, ish-deputet dhe ish-ministër në Qeverinë Berisha, një prej kritikëve të fortë të Lulzim Bashës, do të drejtojë fushatën e kandidatit të koalicionit “Shtëpia e Lirisë” në Shkodër, Bardh Spahia.
Prezantimi i Imamit është bërë dje nga ish-Kryeministri Sali Berisha gjatë një takimi në shtabin elektoral të kandidatit Spahia, ndërsa pjesë e strukturës elektorale do të jenë edhe deputetë dhe ish-deputetë, ish-drejtues të pushtetit vendor në Shkodër, por edhe kryebashkiakja në detyrë, Voltana Ademi.
Por pse u zgjodh Arben Imami si drejtues fushate në bashkinë më të madhe në veri të vendit?
Imami ka qenë drejtues politik për PD në Qarkun e Shkodrës në vitin 2015 dhe në vijim për disa vite, derisa nisi edhe përplasja mes tij dhe Lulzim Bashës.
Në vitin 2015, referuar zhvillimeve të kohës, të vetmit që kundërshtonin Imamin si drejtues politik, ishin disa prej mbështetësve të ish-Kryeparlamentares Topalli. Por edhe këto mosmarrëveshje u shehuan me kalimin e kohës, çka bëri që ish-ministri i Mbrojtjes, të kthehet në një ruajtës ekujlibrash, por edhe të bashkojë grupimet në strukturat e demokratëve.
Duket se raportet e mira të krijuara nga Imami me strukturat e PD, si dhe qëndrimi i tij, jashtë përplasjeve apo klaneve që kanë shoqëruar këto struktura në degën e Shkodrës, kanë bindur Berishën që ai të jetë drejtues fushate.
Pas përplasjeve me Bashën, Imami u shfaq disa herë publikisht, madje edhe me ish-Kryeparlamentaren Jozefina Topalli, duke paraqitur qëndrimet e tyre mbi zhvillimet në PD, por edhe duke dhënë disa propozime, që nuk u morën parasysh nga Lulzim Basha, për zgjidhjen e krizës. Pas kësaj, Imami u tërhoq nga jeta aktive politike, madje nuk ishte pjesë as e Kuvendit të 11 dhjetorit 2021, ditë kur u vendos shkarkimi i Lulzim Bashës si kryetar i PD dhe u miratuan disa ndryshime statutore, që presin verdiktin nga Gjykata e Tiranës.
Ish-deputeti nuk u përfshi as në Grupin e Rithemelimit të PD, ndërsa duket se rikthimin në politikën aktive do e realizojë përmes zgjedhjeve të 6 marsit, ku iu besua edhe fushata për një nga bashkitë kryesore në vend.
