Amaros Deda, i cili humbi jetën në spitalin e Lezhës, dyshohet se është vetëvrarë. Ky është konkluzioni paraprak i policisë.
“Rreth orës 15:15, në rrethana ende të paqarta, dyshohet së është vetplagosur me armë zjarri shtetasi, Amaros Deda, banues në Shenkollë, i cili ka ndërruar jetë në spitalin Rajonal Lezhë. Shërbimet e Policisë dhe grupi hetimor mënjëherë kanë shkuar në vendngjarje dhe po punojnë për sqarimin e plotë të shkakut dhe rrethanave të ngjarjes. Gjithashtu është sekuestruar në cilësinë e provës materiale arma e zjarrit me të cilën dyshohet të jetë kryer vetëvrasja”, njoftoi policia.
I riu rezulton me precedentë penalë.
32-vjeçari është arrestuar në vitin 2011 për grabitje, ku sipas hetimeve, në fshatin Shënkoll ka lidhur e ka keqtrajtuar një të moshuar, 70 vjeçe, e më pas i ka marrë sendet me vlerë në banesë. Ai e kreu krimin në bashkëpunim me një person tjetër, Fatmir Lika, ndërsa u arrestuan vetëm disa orë pas ngjarjes. Ata e kanë lidhur dhe me pas keqtrajtuar të moshuarën, duke i kërkuar t’u tregonte vendin ku mbante paratë. Në momentin e ngjarjes e moshuara ka qenë e vetme në banesë. Kanë qenë familjarët e saj që e kanë gjetur në mëngjes të lidhur, të gjakosur dhe në gjendje të rëndë. Ata sinjalizuan policinë, e cila mbërriti në vend dhe pas hetimeve identifikoi e më pas arrestoi autorët e dyshuar.
Për ngjarjen, Deda u dënua me burg.
