Deputeti demokrat Ervin Salianji tha sot nga foltorja e Kuvendit se vota kundër “vetingut” i shërben Edi Ramës .
Sipas tij, mazhoranca kërkon që vetingu mos bëhet nën monitorimin e ndërkombëtarëve por të bëhet nga KLP e KLGJ, të cilat sipas tij, kontrollohen nga qeveria.
“Ku është sot ky kryereformatori i madh i cili e ka me qejf reformën në drejtësi? E keni parë më parë se si vinte për çdo akt që i shërben drejtësisë së tij? Vinte dhe fliste gjithë kohën si njeriu më i rëndësishëm. Pse nuk del sot dhe ta mbrojë me të madhe? Sepse dy ministra të tij sot janë në burg, një ish-kryetar bashkie është në burg, sepse dhjetëra zyrtarë të tjerë janë denoncuar prej nesh dhe presin radhë. PS dhe Edi Ramës i intereson që vetingun që bëhet nën monitorimin e ndërkombëtarëve të mos jenë më ndërkombëtarët por ta bëjnë dy organe të cilat kontrollohen më shumë prej tij, KLGJ dhe KLP”, tha Salianji.
“Mosvotimi i këtij ligji për zgjatjen e afateve të komisioneve të vetingut është një akt që shkon vetëm në shërbim të Ramës, i shërben atij. Kjo është në interes të PD-së, sepse interesi i PD-së i Shqipërisë. Ne nuk po ja japim këtë shans duke votuar Pro askujt, sepse ky është një akt që nuk ka të bëjë fare me Ramën sepse aty është ONM. Sot ne po diskutojmë dy prioritete të shqiptarëve që janë reforma territoriale dhe reforma zgjedhore”, shtoi ai.
