Lulzim Basha u shpreh sot se trekendëshi i Bermudës, Edi Rama, Ilir Meta dhe Sali Berisha, kanë bërë çfarë është e mundur që të largojnë ONM nga Shqipëria dhe pastaj vettingu të shkojë në drejtim të paditur.
Basha tha se pavarësisht problemeve që ka shfaqur reforma në drejtësi, me ngecje dhe probleme, me komisionerë të korruptuar, ajo mbetet rruga e vetme për integrimin e Shqipërisë në BE.
“Drejtësia nuk është ajo që duam, por procesi nuk mund të mbetet në mes. Sot Kuvendi do të votojë edhe ngritjen e dy komisioneve, atë territoriale dhe atë zgjedhore, që janë prioritete kombëtare”, tha Basha.
Ai tha se reforma në drejtësi ka pasur devijime dhe ngecje, ngecje dhe devijime, por jemi në një moment që ne nuk mund ta lemë në mes, ndaj dhe do të votojmë pro zgjatjes së afateve të organeve të Vetting.
Basha tha se Edi Rama kërkon që vettingun ta bëjë KLP dhe KLGJ, të cilat janë të kapura nga Partia Socialiste, ndërkohë që sot të paktën, pavarësisht se edhe KPK është e kapur, sërisht ka një monitorim ndërkombëtar.
“Falenderoj ambasadorët Kim dhe Soreca që detyruan Partinë Socialiste të votojë zgjatjen e afateve për vetting”, tha Basha, duke argumentuar, sipas tij, se votat pro zgjatjes së afateve të organeve të Vetting nuk i shkojnë në favor Edi Ramës.
