Lulzim Basha ka mbledhur deputetët që e mbështesin në prag të nisjes së seancës parlamentare, ku pritet të votohet ndryshimi Kushtetues, lidhur me zgjatjen e afateve të organeve të vetting.
Mbledhja me deputetët vjen në një kohë kur Basha ka pasur disa negociata me diplomatë të vendeve të BE dhe SHBA, të cilët i kanë kërkuar votën pro ndryshimeve kushtetuese.
Të njëjtat burime bëjnë të ditur se Basha parimisht ka deklaruar se nuk do të bëhet pengesë për drejtësinë. Raportohet se Basha ka kërkuar votën pro miratimit të ndryshimit kushtetues, me argumentin se nuk do të bëhet pengesë, dhe se vota do të bëhet pa kompromise. Basha raportohet të ketë deklaruar se PD do të mbështesë institucionet e drejtësisë në luftën ndaj krimit dhe korrupsionit, ndërsa ka theksuar se prioritet i tij do të jenë reforma zgjedhore dhe ajo territoriale.
Kjo do të thotë se Basha dhe deputetët që mbështesin atë do të zgjasin mandatet e anëtarëve të KPK, emra të propozuar dhe miratuar nga socialistët, edhe pse më parë kanë shprehur kritika dhe akuza të forta ndaj tyre, për një proces të politizuar.
Megjithatë gjithçka pritet të vendoset sot në Kuvend. Ndër të tjera, Basha ka theksuar se dy prej prioriteteve kryesore të saj janë reforma territoriale dhe reforma zgjedhore.
Nuk dihet nëse Basha dhe deputetët e tij do të marrin një vendim për të votuar në bllok pro apo kundër ndryshimit Kushtetues të propozuar nga socialistët dhe mbështetur nga ambasadorët, apo do të luajë lojën duke i lënë pa një vendim final dhe gjithçka mbetet në dorën e ligjvënësve.
Nga ana tjetër situata duket më e qartë në kampin e Berishës, të cilët në daljet e tyre kanë deklaruar votën kundër. Deputeti Edi Paloka shprehu qëndrimin e tij kundër ndonëse nesër nuk do të jetë në Kuvend për të votuar. Madje, ai shkoi edhe më tej duke thënë se nesër do të jetë një tjetër provë se kush është opozita e vërtetë e vendit.
Kushtetuta ka parashikuar se kur KPK-së i mbaron mandati, procesi vijon nga KLP dhe KLGJ. Por nga socialistët është argumentuar se duhet zgjatja e mandatit pasi ky proces i filluar nga ky komision pra vetting-u i gjyqtarëve dhe prokurorëve, duhet të mbyllet nga po ky komision.
