Autoritetet shëndetësore në Greqi njoftuan se kanë vendosur të mos bëjnë më raportim ditor të të gjitha rasteve me persona të infektuar nga virusi Covid-19.
Në të gjithë vendin do të vazhdojnë testimet për kovidin dhe të gjitha rezultatet do të dorëzohen në ECDC greke.
Por për rastet e raportuara do të ketë një ndryshim në treguesit e pandemisë dhe mënyrën e evidentimit të tyre. Kështu, do të raportohen vetëm rastet me simptoma të rënda.
Në publik do të bëhen të ditura vetëm rastet e të infektuarve që shtrohen në spital me rëndim të gjendjes.
Aktualisht në Greqi ka çdo ditë mbi 20 mijë të infektuar të rinj ndërsa midis 400 deri 500 shtrohen në spitale. Vdekshmëria ditore ka arritur në më shumë se 100 vetë.
Njëkohësisht, plani grek që përfshin dhe ndryshimin e masave kufizuese, parashikon ulje graduale të numrit të testeve që do të kryhen çdo ditë.
