Për kreun e PD, Lulzim Bashën takimi me me Dr. Hans-Gert Pöttering, Presidentin e Fondacionit Konrad Adenauer (KAS) të CDU-së të Kancelares Merkel dhe ish President i Parlamentit Europian, ishte stacioni i fundit i takimeve të tij në SHBA dhe BE.
Përmes një postimi në Facebook, Basha duke komentuar këtë takim bën me dije se i ka shprehur Presidentit Pötering mirënjohjen e sinqertë për mbështetjen e jashtëzakonshme të Fondacionit KAS për Partinë Demokratike, veçanërisht në mundësimin e ekspertizës gjermane për hartimin e politikave publike të qeverisjes sonë të ardhshme dhe përgatitjen e politikanëve të rinj të PD-së.
Basha shton se ka diskutuar me Presidentin Pöttering për çështjet kryesore politike që po kalon vendin, si dhe sfidat që duhet të kapërcejmë. Me përvojën e gjatë politike dhe me njohuritë e jashtëzakonshme të politikës gjermanë dhe europiane, ai e ka këshilluar Bashën për rreziqet që e presin Shqipërinë nëse nuk mban dot zgjedhje të lira dhe nuk e pastron politikën nga kapja prej krimit dhe interesave korruptive.
Presidenti Pöttering u shpreh se thelbi i demokracisë europiane janë zgjedhjet e lira dhe llogaridhënia e politikës. Politika e lidhur me krimin dhe e zhytur në korrupsion janë të papajtueshme me vlerat europiane.
