Deputeti demokrat Kreshnik Çollaku ka bërë një propozim në rrjetet sociale për mbylljen e Facebook. Madje Çollaku shkruan se ky do të ishte një kontribut serioz në mbijetesën e qytetërimit tonë.
“Mbyllja e Facebook do të ishte një kontribut serioz në mbijetesën e qytetërimit tonë…”, shkruan Çollaku.
Ky është reagimi i parë publik nga një deputet i opozitës së Lulzim Bashës, që kërkon mbylljen e një prej rrjeteve sociale, që të paktën deri tani, pavarësisht censurimeve, denoncohen me dhjetra fakte dhe problematika, lidhur me keqqeverisjen, por jo vetëm.
Deputeti i Bashës mendon se kjo dritare denoncimesh dhe debatesh, përtej përplasjeve që mund të prodhojë me figura të ndryshme politike, për shkak të qëndrimeve të tyre, duhet të mbyllet. Nuk dihet nëse siç mendon Çollaku, mendojnë edhe kolegë të tij të rrjeshtuar në krah të Bashës, por ky propozim i shkon për shtat kryesisht Qeverisë, e cila sot në Shqipëri pothuajse ka vënë nën kontroll gjithçka.
Gjithsesi, deputeti Çollaku kaq ka në dorë, të bëjë propozime, të cilat mund të nisen edhe nga fakti se shpeshherë qëndrimet e tij politike kontestohen nga demokratët, ata që mendojnë se deputeti dhe linja ku ai është përfshirë janë uzurpues të PD-së.
