“ARMO t’i kthehet publikut”. Me këtë mesah ka dalë sot, bashkëthemeluesi i LIBRA-s, Ben Blushi. Përveç idesë së tij, Blushi thotë se Rilindja mund tua shlyejë paratë naftëtarëve me Dakon.
“Rilindja që takson më shumë punën dhe trurin se dhjamin, – shkruan Blushi, – e ka braktisur njërën nga pronat me të vyera te vendit që është kompania ARMO. Çdo ditë punonjësit kërkojnë pagat dhe sigurimet e prapambetura të cilat nuk jepen nga klientët e Rilindjes.
Sot ARMO po shfrytëzohet në mënyrë barbare dhe jo ligjore si gjithë sektori i naftës nga i cili humbim afro 200 milionë euro në vit.
Meqë Rilindja e ka shitur ARMO padrejtësisht, po them çfarë do të bëjë LIBRA: Do t’ia kthejë publikut. Shqiptarët duhet të jenë pronarët e kësaj prone që po vidhet, shpërdorohet dhe keqtrajtohet.
Vetëm paratë që Rilindja i ka dhënë Vangjush Dakos për të shëmtuar Durrësin në katër vjet, do të mjaftonin për të shlyer pagat ndaj punëtorëve dhe për ta kthyer ARMON në pasuri të përbashkët,” nënvizon Blushi.
Mesazhi i Blushit vjen pak ditë pasi punnjësit e Rafinerisë së Naftës në Fier dolën në protestë për pagat e papaguara prej 3-4 muajsh dhe njeri prej tyre iu ngjit oxhakur duke kërcënuar të vriste veten.
