Mehmeti me “dorë të hekurt”, largon dy lojtarë nga stërvitja

Partizani u kthye ditën e djeshme për herë të parë në stërvitje, pas humbjes së dhimbshme me shifrat 1-0 ndaj Laçit në fundjavë.

Ndeshja e radhës është ajo ndaj Teutës, tjetër mision i vështirë, ku natyrshëm presioni është shumë më i madh për shkak se në dy betejat e fundit rezultatet kanë munguar dhe është grumbulluar vetëm 1 pikë, në një kohë kur kundërshtarët direkt kanë fituar dhe shkëputja me ta është thelluar edhe më shumë.

Stërvitja nisi siç ishte programuar, në orën 11:30, me lojtarët, që pas një bisede të shkurtër me trajnerin dhe stafin, nisën xhiron e nxehmjes rreth fushës.

Ai i sforcoi jo pak futbollistët me ushtrime me kërcime të fuqishme dhe pesha.

EPISODI ME LIÇON – Në nisje të ushtrimeve të forcës në fakt ndodhi edhe një episod jo shumë i këndshëm, megjithëse i zakonshëm në futboll.

Trajneri Dritan Mehmeti pa diçka jo siç duhej te Dean Liço dhe një prej talenteve të akademisë dhe vendosi t’i përjashtojë përfundimisht nga stërvitja.

Nuk dihet tamam shkaku, por një hamendësim përse trajneri vendosi kështu, mund të jetë fakti se dy të rinjtë, ndryshe nga pjesa tjetër e futbollistëve, ishin ende me taka.

Ushtrimet e forcës zhvillohen gjithmonë me atlete normale për shkak të specifikës së tyre. “Jashtë, të dy jashtë”, u shpreh Mehmeti, me lojtarët, që u ndanë nga pjesa tjetër e grupit.

Dean Liço, ndryshe nga shoku tjetër i ekipit, vendosi të qëndrojë ende në fushë.

Fillimisht u ul në pankinë, e pas pak sekondave, ai vendosi t’i bashkohet Kallakut, Belicës dhe Rrapajt, të cilët po vraponin të veçuar rreth fushës.

Pas pak minutash, Mehmeti dhe Liço zhvilluan një bisedë, ku trajneri duket jo pak i ingranuar.

Pas kësaj, Liço kthehet sërish në pankinë, ku qëndron me kokën poshtë, i zhgënjyer për atë çfarë ndodhi.

Pas disa minutash, mesfushori në pronësi të Askolit u largua nga fusha, drejt dhomave të zhveshjes.

/Panoramasport