Armand Shkullaku, i ftuar në emisionin “Të Paekspozuarit” në MCN TV, foli për primaret e zhvilluara nga Partia Demokratike (grupi Berisha) dhe zgjedhjet e pjesshme lokale, ku ky grupim do të jetë në një koalicion me LSI.
Shkullaku tha se primaret janë një hap i parë pozitiv në PD, që do ta nxisin partinë, që procesi në të ardhmen të bëhet më i rregullt, ndërkohë që mund të detyrojnë edhe kundërshtarin politik, të adoptojë një proces të ngjashëm.
“Primaret si këto, janë një hap përpara. Sigurisht jemi koshient se janë bërë në kushte të jashtëzakonshme, sepse shpallja e zgjedhjeve lokale ishte në kushte të jashtëzakonshme. Grupimi i zotit Berisha kishte shumë pak kohë, por si hap i parë jep garanci, që pas një viti, PD nuk do të kthehet pas në emërimin e kandidatëve. Është e dënuar që pas këtij hapi, të bëjë primare gjithmonë e më të rregullta.
Pra do të jetë një proces që ndodh rëndom në shumë vende. Me gjithë imperfeksionet që pati, si hap i parë është për t’u përshëndetur. E dënon PD-në që të shkojë në një hap më të lartë, por detyron edhe kundërshtarin që t’i ofrojë elektoratin një mënyrë demokratike të zgjedhjes së kandidatëve.
Sa i takon koalicionit, e shoh në dy aspekte, teknik dhe politik. Në aspektin teknik është zgjidhja më e mirë për PD-në, përfaqësuar nga Berisha, për shkak se gjykata nuk është shprehur akoma. Futja në koalicion krijon një logo të re, nuk zhduk logon e PD dhe as atë të LSI. Do të jenë kandidatët e PD, sepse kanë mundësi reale potencialë për të fituar, të marrin një ose dy prej bashkive, do të ishte rasti më i mirë. Këto mund të quhen si primare të koalicionit, për sa kohë LSI nuk ka kandidat të tyre.
Sa i takon aspektit politik, është parparësi e madhe e zotit Berisha në këtë garë.
Kam qenë edhe më parë, që çdo forcë opozitare, që është kundër regjimit të Ramës, duhet të bashkohet. Kam qenë që PD dhe LSI të hynin me listë të përbashkët edhe në zgjedhjet e 25 prillit. Kemi shembullin që PD e zotit Basha, fraksioni i selisë, goditën edhe LSI-në edhe Berishën. Duke i patur ata brenda, nuk e mundi dot regjimin. Po pa këta?
LSI ka që në 2018 i ka qëndruar luajale PD-së. Nuk e kuptoj këtë, që bashkë me trekëndëshin e bermudës, bashkë me dy brinjët, nuk e munde dot Ramën, tani do i mundësh bashkë… Një koalicion me LSI dhe çdo parti që bashkohet në një sigël, për mua është ok politikisht”, tha Shkullaku.
