Arben Ristani, i ftuar në emisionin “Të Paekspozuarit” në MCN TV, ka folur për primaret e zhvilluara në bazën e PD, ku fituan gjashtë kandidatë, që do të përfaqësojnë koalicionin PD (grupi Berisha) dhe LSI në zgjedhjet e pjesshme lokale.
Ristani tha se këto primare ishin “demokracia në veprim”. Ai shpjegoi procesin dhe u shpreh se pjesëmarrja ishte e lartë.
“Procesi i primareve është demokracia në veprim. Kur erdhi Clinton para disa vitesh, tha nëse doni të shihni demokracinë në veprim, ejani në Shqipëri. I njëjti vullnet i PD, bëri që këtë demokraci ta shohim gjatë primareve.
E nisëm në statutin që miratuam në 11 dhjetor. Sollëm risitë e një statuti që nuk e ka asnjë parti në Shqipëri. Rivendosëm referendumin, njohëm fraksionet. Risi që do t’i shohim në veprim. Filluam me primaret, meqenëse u shpall edhe data e zgjedhjeve lokale. Vendosëm që kandidaturat do të tërhiqen nga propozimet e anëtarësisë.
U zhvilluan primaret, një masivitet i anëtarësisë. Ju i patë rradhët. Në Shkodër, në Durrës. Ndoqa në dy nga degët në Vorë dhe Rrogozhinë, zhvillimin e primareve. Mediat kanë qenë prezent gjatë të gjithë kohës. Rezultati, gjashtë të propozuarit, figura shumë të mira“, tha Ristani.
Duke komentuar kandidatin e Dibrës, Premtim Kryemadhi, Ristani tha se nuk është kandidat i LSI, siç qarkulloi në disa qarqe, për shkak të mbiemrit të njëjtë me Monika Kryemadhin, por është një person me lidhje të forta me PD, të cilin e mbështet edhe LSI.
“Kandidatura e Dibrës, nuk është i LSI, mund të mbështetet nga LSI, por vjen nga Partia Demokratike, eksponent i PD dhe me lidhje të forta në PD“, tha ndër të tjera Ristani.
