Një 24-vjeçar u arrestua nga policia e Tiranës pasi akuzohet se nën drejtimin e një automjet, ka aksidentuar një vajzë 26 vjeçe dhe më pas është larguar nga vendngjarja.
“Specialistët e Qarkullimit Rrugor bënë arrestimin në flagrancë të shtetasit A.T., 24 vjeç, për veprat penale ‘Shkelja e rregullave të qarkullimit rrugor’ dhe ‘Largimi nga vendi i aksidentit’ pasi në rrugën ‘Shahin Doçi’, ka aksidentuar shtetasen K.S., 26 vjeçe, këmbësore, dhe më pas është larguar nga vendi i ngjarjes, për të fshehur automjetin. 26-vjeçarja ndodhet në spital, jashtë rrezikut për jetën. Shërbimet e Policisë Rrugore të Tiranës, pas marrjes së njoftimit, menjëherë organizuan punën për identifikimin dhe kapjen e autorit të dyshuar. Pas disa orësh pune intensive hetimore profesionale bënë të mundur identifikimin e targës së automjetit dhe më pas të drejtuesit të mjetit”, njoftoi policia.
Shërbimet e Policisë kanë bllokuar në cilësinë e provës materiale automjetin tip “Benz”, ndërsa materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme procedurale, shtuan të njëjtat burime.
