Këtë vit Instituti i Statistikave do të zhvillojë censin e popullsisë dhe banesave, të planifikuar për në vitin 2020, por të shtyrë pas tërmetit dhe pandemisë. Kostot për këtë sondazh mbarëkombëtar janë llogaritur në të paktën 16 milionë euro.
I planifikuar të zhvillohet gjatë muajit Tetor, në këtë cens për herë të parë do të përdoren pajisjet tabletë, që zëvendësojnë pyetësorët në formë letër. Ndërsa do të ndihmojë edhe në krijimin e një regjistri statistikor të popullsisë dhe ndërtesave, falë edhe sistemit të informacionit gjeografik.
Pandemia shtyu krahas censit të 12-të që organizohet në Shqipëri, edhe censin e Bujqësisë, i planifikuar fillimisht të zhvillohej këtë vit. Në të do të detajohen të dhëna për madhësinë e fermave shqiptare, strukturën e tokës, blegtorinë, fuqinë punëtore, makineritë dhe teknologjitë bujqësore, etj.
Ky program shihet me rëndësi, jo vetëm nga ana statistikore, por edhe për të kuptuar nevojat që kanë fermerët sot dhe për të hartuar politika të detajuara ndihme.
