Nga Boldnews.al
Kryetarja socialiste e Komisionit Parlamentar të Ligjeve, Klotilda Bushka, u tregua e bezdisur kur Nëna Liza kërkonte llogari për veprimet e kryetarit të Bashkisë së Tiranës, gjatë një seance dëgjimore për prishjen e banesave në zonën e “5 Majit”.
Bushka i kërkoi 75-vjeçares Liza Marku që “të mos bënte politikë”, ndërkohë që e moshuara, me nota të theksuara revolte, po u tregonte parlamentarëve se si ishte nxjerrë me forcë policore nga shtëpia e saj, tashmë e kthyer në gërmadha, pas një operacioni të dhunshëm mëngjesin e 19 janarit 2022.
Pas reagimit të deputetëve, Bushka, një bashkëpunëtore e hershme e Erion Veliajt, e kuptoi gafën dhe u përpoq të rregullonte disi situatën, por gjithnjë duke këmbëngulur se Nënë Liza nuk duhet të fliste për politike, pikërisht në sallën e asaj që mund të konsiderohet si “tempulli i politikës”.
Indiferenca e kryetares së Komisionit të Ligjeve për nënën e varfër dhe tashmë të pastrehë nga projekti i dyshimtë i Bashkisë së Tiranës për ‘Rindërtimin” në zonën “5 Maji” duket se vjen nga shëndeti i bollshëm i pasurisë së saj, me pasuri të patundshme e llogari të shumta bankare.
Pasuria e Bushkës
Klotilda Bushka ka dorëzuar deklaratën “para fillimit të detyrës” pranë Inspektoratit të Lartë të Deklarimit e Kontrollit të Pasurive dhe Konfliktit të Interesave (ILDKPKI) në shtator 2017, pasi mori mandatin e deputetit.
Sipas të dhënave të vetëdeklaruara, në formularin e parë ajo shënon se ka në pronësi 50 përqind një apartament me sipërfaqen 114 metra katrorë, me çmim të rivlerësuar 7.9 milionë lekë të reja, si edhe një apartament tjetër, po në pronësi 50 përqind, me sipërfaqe 91 metra katrorë, me vlerë 57.900 euro.
Më tej deklaron se ka në pronësi edhe një sipërfaqe ullishte në zonë rurale në Tiranë, me sipërfaqe 4300 metra katrorë, të blerë me çmim 21 mijë euro.
Gjithashtu, deputetja Bushka deklaron se zotëron edhe 9 llogari bankare në monedhën lek dhe euro, të krijuara nga të ardhurat e angazhimit profesional në zyrë avokatore dhe në këshill bashkiak, për një total për mbi 5 milionë lekë të reja.
Po ashtu, Klotilda Bushka deklaron se ka edhe dy kredi për blerje apartamenti, njërën në vlerë 35 mijë euro dhe tjetrën në vlerë 60 mijë euro.
Ndërkohë, bashkëshorti i saj zotëron një apartament në Devoll, të përfituar nga trashëgimia ligjore, si edhe një sipërfaqe 4 mijë metra katrorë, për të cilën ai ka shënuar se e ka marrë dhuratë nga xhaxhai i tij.
Në vitin 2020, Klotilda Bushka dhe bashkëshorti i saj, blejnë edhe një shtëpi tjetër, në Tiranë, me sipërfaqe 106 metra katrorë, me vlerë 190 mijë euro, të paguar pjesërisht me të ardhurat e fituara ndër vite.
Pjesa tjetër e çmimit do të paguhet në dy vitet e ardhshme, sipas shënimeve të vetë Bushkës në formularin e pasurisë.
Klotilda Bushka drejtoi këtë të Premte (28.01.2022) seancën dëgjimore të Komisionit të Ligjeve, lidhur me veprimet e Bashkisë së Tiranës dhe Policisë së Shtetit për prishjen e disa godinave në rrugën “5 Maji”, në kuadër të procesit të Rindërtimit.
Në këtë seancë u dëgjua qëndrimi i Drejtorit të Përgjithshëm të Policisë, Gledis Nano, si edhe disa prej banorëve të dëmtuar, një prej të cilëve ishte edhe Liza Marku, e njohur edhe si “Nënë Liza”.
Në seancë ishte ftuar të jepte sqarimet edhe kryetari i Bashkisë së Tiranës, Erion Veliaj. Por, ai nuk denjoi të paraqitej personalisht në këtë seancë, duke dhënë argumentat me shkrim, siç deklaroi kryesuesja e seancës, Klotilda Bushka.
