Kryeministri Edi Rama po mundohet ti japë rëndësi atij që e konsideron si Këshilli Kombëtar, duke e propaganduar prej disa ditësh, si një proces konsultativ me qytetarët për marrjen e vendimeve të rëndësishme. Në fakt i gjithë procesi është një show, pasi Shqipëria vijon të mbetet ndër të paktat vende, ku qytetarët nuk mund të shprehen me referendum lidhur me çështje të rëndësishme, përfshi edhe dhjetra e dhjetra vendime me karakter lokal apo kombëtar, pavarësisht se ato merren në emër të tyre nga një apo grup personash të zgjedhur apo emëruar.
Gjithsesi kjo nuk e shqetëson aspak Kryeministrin i cili thotë se pyetësorët e Këshillimit Kombëtar të shpërndara me postë për qytetarët kanë kaluar numrin 1000, ndërsa numri i pyetësorëve të plotësuar online ka kaluar mbi 36.000.
Madje si për të treguar se atij i interesojnë vetëm qytetarët, Rama thotë se teksa politika “zhurmon nga bravat, qysqitë, sharjet e përçarjet për llogari të atyre që nuk kanë më asgjë për t’i dhënë Shqipërisë”, fton qytetarët të japin mendimin e tyre mbi pyetjet në Këshillimin Kombëtar.
“Si njerëz, për shtëpinë tonë Shqipërinë dhe le të marrim vendimet e duhura për të nesërmen”, thotë Rama.
“Kalon mbi 1000, numri i pyetësorëve të parë të kthyer me postë nga qytetarët e përfshirë në Këshillimin Kombëtar, ndërkohë që ka kaluar mbi 36.000 numri i pyetësorëve të plotësuar online në linkun … Le të vazhdojmë të dëgjojmë njëri – tjetrin si shqiptarë, si qytetarë, si njerëz, për shtëpinë tonë Shqipërinë dhe le të marrim vendimet e duhura për të nesërmen, teksa politika zhurmon nga bravat, qysqitë, sharjet e përçarjet për llogari të atyre që nuk kanë më asgjë për t’i dhënë Shqipërisë”, shkruan kryeministri.
Në fakt, nëse Rama do të ishte real në ato që thotë, minimalisht duhej ti jepte një përgjigje atyre banorëve të 5 Majit, banesat e të cilëve ua shembi me polici, sikundër veproi edhe në rastet e mëparshme qoftë në zonën e ish-stacionit të Trenit, Unazës së Madhe apo Laprakë.
