Sot u publikua lajmi se Shqipëria kishte shënuar rekordin më negativ në historinë e shtetit me një borxh prej 80.1% të Prodhimit të Brendshëm Bruto.
Lidhur me këtë rekord negativ, ka ardhur reagimi nga ana e deputetëve të PD, të cilët kanë shpalosur një banderolë në Kuvend ku shkruhet: Medalje ari për qeverinë e borxhit publik.
Dashnor Sula dhe Saimir Korreshi ishin dy deputetët që e shpalosën banderolën në foltoren e Kuvendit dhe me pas akuzuan qeverinë se këto shuma parash nuk po përdoreshin për investime por vetëm për financimin e PPP-ve. Sula ndër të tjera tha se kjo ishte një barrë që do i mbetej në kurriz shtetasve shqiptarë në të ardhmen.
“Ne nuk do jemi gjallë, por do jenë nipërit tanë të cilët duhet të paguajnë këtë borxh. Imagjinoni që edhe ai që ka lindur në datën 1 janar ka mbi 5 milionë lekë në kurriz. Kjo qeveri e meriton totalisht medaljen e arit për borxhin publik. Këto para ku shkojnë? A injektohen në ekonomi? Jo, shumica e këtyre borxheve janë për të financuar PPP-të”, tha Sula.
