Deputeti Enkelejd Alibeaj po shfaqet si shpëtimtar i Lulzim Bashës në çdo situatë që i krijohet. Dhe Basha, sa herë që mbetet një pozicion vakant, emëron Alibeajn.
Vetëm në javët e fundit, ndoshta as Alibeaj nuk e di se në sa pozicione është emëruar nga Lulzim Basha për shkak të largimeve të disa funksionarëve, përjashtimeve, përplasjeve që janë krijuar në rradhët e demokratëve.
Së fundmi Alibeajt i është besuar pozicioni i drejtuesit Politik në qarkun e Shkodrës. Pas dorëheqjes së Helidon Bushatit, Basha nuk ka humbur kohë dhe ka çuar Alibeajn.
“Duke e konsideruar qarkun Shkodër si një nga qarqet më të rëndësishme për Partinë Demokratike, Kryetari i Partisë Demokratike ka vlerësuar se qarku Shkodër ka të domosdoshme drejtimin nga një funksionar i lartë i PD dhe ka zgjedhur si Drejtues Politik të qarkut Shkodër, Nënkryetarin e PD dhe Kryetarin e Grupit Parlamentar z. Enkelejd Alibeaj.
Duke falenderuar z. Helidon Bushati për rolin dhe përgjegjësinë e marrë në drejtimin e qarkut gjatë betejës elektorale të 25 Prillit dhe fokusimin e tij aktual tek beteja parlamentare kundër regjimit të korruptuar të Edi Ramës, Kryetari i PD shpreh bindjen se me drejtimin e ri politik, Partia Demokratike në Qarkun e Shkodrës do të jetë bastion i fuqishëm i PD dhe në krye të fitores së PD në gjithë Shqipërinë”, thuhet në reagimin zyrtar të Zyrës së Lulzim Bashës.
Kur u largua Alfred Rrushaj si kryetar i Grupit Parlamentar, Basha e gjeti zgjidhjen te Alibeaj. Kur përjashtoi kreun e degës së PD në Vlorë, Genc Deromenajn, sërisht Basha e gjeti zgjidhjen me Alibeajn. Ky i fundit gjithashtu drejton edhe Qarkun e Fierit si drejtues Politik, dhe nuk përjashtohet mundësia që në ditët në vijim ti ngarkohen edhe detyra të tjera.
