Në një kohë që Komisioni Qendror i Zgjedhjeve ka caktuar anëtarët e KZAZ-ve për 6 bashkitë ku do të mbahen zgjedhjet e pjesshme vendore, PS ka ndezur “motorët” e fushatës.
Kryetari i PS Edi Rama ka nisur sot takimet bashkë me Sekretarin e Përgjithshëm, drejtuesit politikë dhe deputetët e qarqeve ku ka zgjedhje. Takimi i parë sot ishte në Fier dhe ka zgjatur rreth një orë. Sipas burimeve për abcneës.al është folur mbi kandidaturat e PS për bashkinë Lushnje. Kryesisë i është propozuar për kandidate për kryetare të bashkisë Lushnje, Eriselda Sefa. Aktualisht Eriselda Sefa është kryetare e komanduar në këtë bashki.
Kujtojmë se Grupi parlamentar i Partisë Socialiste zhvilloi një mbledhje këtë të hënë. Pjesëmarrës në këtë takim ishte edhe kryeministri Edi Rama. Ai i dha udhëzimet deputetëve të tij në këtë sesion parlamentar. Do të jenë disa çështje kryesore që do të shoqërojnë jetën politike. Rama nisi me Këshillimin Kombëtar, vazhdoi me zgjedhjet e pjesshme lokale dhe përfundoi me çështjen e Presidentit të ri.
Në mbledhjen e grupit parlamentar Kryeministri Edi Rama tha se në muajin Prill duhet të zgjidhet Presidenti i Republikës. Ai i kërkoi deputetëve të tij që të gjejnë mënyra se si të këshillohen edhe me qytetarët për këtë vendimmarrje. Kryeministri tha se me situatën në PD është i vështirë dialogu me opozitën.
Nga ana tjetër KQZ miratoi partitë politike që kanë të drejtë të propozojnë anëtarë të KZAZ-ve.Tre anëtarë propozohen nga Partia Socialiste ; Dy anëtarë propozohen nga Partia Demokratike, ndërsa një anëtar propozohet nga Lëvizja Socialiste për Integrim.
Partia Socialiste do të propozojë anëtarin e shtatë të KZAZ-ve me numër tek dhe Partia Demokratike do të propozojë anëtarin e shtatë të KZAZ-ve me numër çift. Sekretari i KZAZ-së do të propozohet nga partia Socialiste në KZAZ-të ku Partia Socialiste ka propozuar zëvendëskryetarin e KZAZ-së, dhe nga Partia Demokratike në KZAZ-të, ku Partia Demokratike ka propozuar zëvendëskryetarin e KZAZ-së. Partitë politike duhet të paraqesin kandidaturat për anëtarë të KZAZ-ve jo më vonë se data 25 Janar 2022.
