Presidenti amerikan, Donald Trump firmosi sot ndërtimin e naftësjellësit mjaft të diskutueshëm “Keystone XL” që lidh Kanadanë dhe SHBA, një projekt gjigant i bllokuar nga paraardhësi i tij Barack Obama, sipas disa mediave amerikane.
Trump firmosi edhe nisjen e projektit të gazsjellësit të kompanisë “Energy Transfer Partners” në Dakotën e Veriut, ku ndërtimi i kësaj vepre u hodh poshtë në dhjetor pas një mobilizimi masiv të amerikano-indianëve dhe ambientalistëve.
Fisi indian, Siu, në Standing Rock akuzon kompaninë se dëshiron të kalojë gazsjellësin, i emërtuar “Dakota Access Pipeline”, mbi zonat e shenjta ku janë varrosur të parët e tyre, duke kërcënuar në të njëjtën kohë dhe burimet me ujë të pijshëm në këtë shtet në pjesën veriore të SHBA-së.
Me një gjatësi rreth 1 900 kilometra, duke përfshirë 1 400 në SHBA, “Keystone XL” synon të transportojë naftë kanadeze nga zonat ranore bituminoze të Albertas (në perëndim të Kanadasë) deri në Nebraskë (qendër e SHBA) nga ku mund të arrijë rafineritë amerikane të Gjirit të Meksikës.
